Gjykata e Shkallës së Parë të Juridiksionit të Përgjithshëm Lezhë ka vendosur pushimin e çështjes penale ndaj tre personave që ishin të dyshuar për përplasjen me armë zjarri të ndodhur në fshatin Rrilë, ngjarje në të cilën mbeti i plagosur shtetasi Agron Puka. Vendimi është marrë nga gjyqtari Lirim Bulica, i cili ka pranuar kërkesën e Prokurorisë për mbylljen e procedimit penal ndaj Vinçens Tukut, Kevin Ndokës dhe Amarildo Kola (Ndreca).

Ngjarja për të cilën tre shtetasit ishin vënë nën hetim dhe ishin shpallur në kërkim daton mëngjesin e 6 marsit 2024, ku para shkollës 9-vjeçare të fshatit Rrilë pati një shkëmbim armësh zjarri. Prokuroria e Lezhës kishte ngritur fillimisht ndaj tyre akuzat për “Vrasje me paramendim”, kryer në bashkëpunim dhe e mbetur në tentativë, si dhe për “Mbajtja pa leje e armëve, armëve shpërthyese dhe municionit”. Megjithatë, pas hetimeve të drejtuara nga prokurorja Irena Sufaj, organi i akuzës vlerësoi se gjatë procesit hetimor nuk u siguruan prova të mjaftueshme që t’i implikonin tre të rinjtë në këtë ngjarje kriminale.

Në bazë të këtyre konkluzioneve, drejtuesi i Prokurorisë së Lezhës, Arben Nika, iu drejtua gjykatës me kërkesë zyrtare për pushimin e çështjes dhe heqjen e masave të sigurisë. Me vendimin e datës 09.09.2026, gjykata ka vendosur pushimin e hetimeve për Vinçens Tukun dhe të tjerët, si dhe ka urdhëruar shuarjen e masës së sigurimit personal “arrest në burg”, e cila ishte caktuar më parë ndaj tyre gjatë muajit mars dhe tetor të vitit 2024.