Pas një pune intensive hetimore, shërbimet e Komisariatit të Policisë Fier, në bashkëpunim me Forcën e Posaçme "Shqiponja" dhe nën drejtimin e Prokurorisë, kanë finalizuar operacionin policor të koduar “Shëtitësit”. Si rezultat, janë vënë në pranga tre shtetas të dyshuar siautorë të disa vjedhjeve të banesave, ndërsa po punohet për dokumentimin e veprimtarisë së tyre edhe në qarkun e Gjirokastrës.

Në kuadër të këtij operacioni u kapën në flagrancë në qendër të Patosit, duke lëvizur me automjet, shtetasit F. Gj., 43 vjeç, banues në Gjirokastër; D. A., 31 vjeç, banues në Gjirokastër; dhe I. I., 41 vjeç, banues në Tepelenë. Gjatë kontrollit fizik të ushtruar ndaj shtetasit F. Gj., si dhe gjatë kontrollit të banesës së shtetasit D. A., shërbimet e policisë gjetën dhe sekuestruan sasi të lëndës narkotike cannabis sativa.

Nga hetimet e deritanishme rezulton se këta persona, në datat 5 dhe 6 gusht, në lagjen “1 Maji” dhe në fshatin Dukas të Patosit, kanë vjedhur në dy banesa, ku kanë marrë bizhuteri floriri, 3500 euro dhe dy aparate celularë. Po ashtu, më datë 9 shtator, ata dyshohet se kanë tentuar të vjedhin edhe në dy banesa të tjera në fshatin Zharrëz.

Autoritetet policore, në bashkëpunim me DVP Gjirokastër, po vijojnë veprimet e mëtejshme për të zbardhur dhe dokumentuar plotësisht ngjarjet e tjera ku mund të jenë të përfshirë këta shtetas në qarqet Fier dhe Gjirokastër.

Materialet procedurale i kanë kaluar Prokurorisë pranë Gjykatës së Shkallës së Parë të Juridiksionit të Përgjithshëm Fier, për veprat penale “Vjedhja” dhe “Prodhimi dhe shitja e lëndëve narkotike”.