Një ngjarje e paprecedentë dhe e organizuar me detaje ka ndodhur mbrëmjen e së premtes në oborrin e Spitalit të Përgjithshëm të Serres në Greqi, ku një i burgosur shqiptar është arratisur pas një ndërhyrjeje të armatosur.

Ngjarja u regjistrua rreth orës 23:30 gjatë transferimit të të dënuarit nga Burgu i Nigritës drejt repartit psikiatrik të spitalit. Në momentin e mbërritjes, dy automjete me drita të ngjashme me ato të policisë bllokuan mjetin e transportit të burgut.

Personat e armatosur dolën nga makinat, kërcënuan dhe neutralizuan dy rojet e eskortës, duke u marrë atyre edhe armën e shërbimit përpara se të largoheshin me shpejtësi bashkë me të burgosurin.

I arratisuri është një 41-vjeçar shqiptar me rrezikshmëri të lartë, i arrestuar një vit më parë nga Krimi i Organizuar në Selanik për tentativë vrasjeje, si dhe i dyshuar për përfshirje në trafik droge e arme.

Autoritetet helene kanë ngritur pika të shumta kontrolli dhe kanë nisur një operacion masiv kërkimi në të gjithë rajonin për kapjen e 41-vjeçarit dhe grupit të armatosur që orkestroi sulmin.