Një deklaratë e fortë e Sekretarit të Sigurisë Kombëtare të SHBA-së, Mark Wayne Mullin, ka rikthyer në qendër të vëmendjes dhe debatit politik procedurat e emigracionit të kongresmenes demokrate nga Minesota, Ilhan Omar.

Gjatë një interviste për podkasterin konservator Benny Johnson në margjinat e konventës republikane në Dallas, Mullin pretendoi se Omar ishte martuar me vëllain e saj për ta ndihmuar atë të emigronte drejt Shteteve të Bashkuara. Zyrtari i lartë konfirmoi se çështja po i nënshtrohet një hetimi zyrtar nga autoritetet kompetente.

"Ne e dimë që ajo u martua me vëllain e saj për të provuar ta sillte në SHBA. Nëse mund të vërtetojmë se nuk duhet të ishit këtu që në fillim, do t’ju deportojmë. Por nëse do të ecim përpara, dua të sigurohem që kjo të mos jetë një çështje politike, por një çështje e vërtetë ligjore," deklaroi Mullin.

Sipas tij, verifikimet mund të shtrihen edhe te pjesëtarë të tjerë të familjes së Omarit për të parë nëse ka pasur shkelje të procedurave të natyralizimit ose dhënie të të dhënave të rreme — veprime që sipas ligjit amerikan nuk parashkruhen dhe mund të çojnë deri në heqjen e shtetësisë dhe deportim.

Ilhan Omar, e cila ka lindur në Somali dhe ka marrë shtetësinë amerikane në vitin 2000, i ka hedhur poshtë me forcë këto akuza duke i cilësuar si "absurde, fyese dhe të motivuara politikisht". Ajo është martuar ligjërisht me Ahmed Noor Said Elmi në vitin 2009 dhe është divorcuar në vitin 2017, duke deklaruar se marrëdhënia e tyre kishte qenë e shkurtër dhe pa asnjë lidhje gjaku.

Çështja është bërë pjesë e shkëmbimeve të ashpra politike gjatë muajve të fundit, ku edhe Presidenti Donald Trump dhe Zëvendëspresidenti J.D. Vance kanë bërë deklarata publike duke ngritur dyshime për mashtrim me procedurat e emigracionit. Aktualisht, kongresmenja demokrate nuk është dënuar nga asnjë gjykatë për këto pretendime.