Një aksident rrugor ka ndodhur në orët e para të mëngjesit të së shtunës në zonën e Porto Palermos, në bashkinë e Himarës, duke lënë të plagosur tre persona.

Ngjarja është regjistruar rreth orës 05:00, kur shërbimet e emergjencës janë njoftuar për një automjet që kishte dalë nga rruga dhe ishte përmbysur plotësisht. Me mbërritjen në vendngjarje, ekipet e shpëtimit gjetën tre persona të dëmtuar brenda mjetit, të cilët u transportuan menjëherë me ambulancë drejt spitalit për të marrë ndihmën e nevojshme mjekësore.

Deri më tani nuk dihen ende shkaqet e sakta të përmbysjes së automjetit dhe as gjendja e detajuar shëndetësore e të aksidentuarve. Grupi hetimor dhe policia ndodhen në terren ku po kryejnë veprimet e para për zbardhjen e plotë të dinamikës dhe rrethanave të ngjarjes.