Treni del nga shinat në Francë, 44 të plagosur – 18-vjeçarja në gjendje të rëndë

Një tren rajonal TER që udhëtonte nga Rouen drejt Caen doli nga shinat mbrëmjen e së premtes pranë Cléon, në rajonin Seine-Maritime të Francës, raporton noa.al duke cituar Le Monde.

Nga aksidenti mbetën të plagosur 44 persona. Një vajzë 18-vjeçare ndodhet në gjendje të rëndë dhe u transportua me helikopter drejt Qendrës Spitalore Universitare të Rouen, ndërsa 43 persona të tjerë morën ndihmë mjekësore për dëmtime më të lehta.

Në tren ndodheshin 186 pasagjerë në momentin e aksidentit. Në vendngjarje u mobilizuan rreth 130 zjarrfikës, pesë ekipe mjekësore dhe 80 automjete të emergjencës.

Testet për alkool dhe lëndë narkotike të kryera ndaj drejtuesit të trenit rezultuan negative. Shkaqet e daljes së trenit nga shinat mbeten ende të paqarta dhe autoritetet kanë nisur hetimet.

Një pasagjer tregoi se fillimisht kishte ndjerë disa lëkundje, të cilat brenda pak sekondash ishin bërë shumë të forta. Sipas tij, disa xhama të vagonëve u thyen dhe gurë nga shinat hynë brenda trenit.

Aksidenti shkaktoi gjithashtu ndërprerje dhe vonesa të mëdha në qarkullimin hekurudhor mes Rouen–Caen dhe Caen–Le Havre. /noa.al

Foto: AFP