Kryeministri Edi Rama ka sqaruar arsyet e qëndrimit të tij mbështetës ndaj zëvendëskryeministres Belinda Balluku pas kërkesës së SPAK-ut për pezullimin e saj nga detyra, duke e cilësuar këtë masë si “absurde” dhe të paprecedentë në historinë politike.

Përmes një interviste, kreu i qeverisë theksoi se reagimi i tij nuk kishte të bënte me mbrojtjen e një emri të përveçëm, por me mbrojtjen e parimit kushtetues të ndarjes së pushteteve. Rama deklaroi se vendimi i prokurorëve dhe gjyqtarëve për të pezulluar një anëtar kabineti përbën një kapërcim të kompetencave që cenon drejtpërdrejt rolin e Kryeministrit, Parlamentit dhe Presidentit.

"Ata janë pushtet i pavarur për të vendosur sanksione penale nëse ne shkelim ligjin, por nuk janë të pavarur për të vendosur për ne. Aty është vija e kuqe," u shpreh ai, duke nëvizuar se SPAK-u në këtë rast hyri në territorin e ekzekutivit dhe të shumicës parlamentare që ka votuar qeverinë.

Sipas kryeministrit, lejimi i një praktike të tillë do të cenonte vetë sistemin e drejtësisë që po ndërtohet. Ai siguroi se të njëjtin qëndrim institucional do ta mbante për çdo ministër tjetër të kabinetit që do të përballej me një masë të ngjashme pezullimi.