Drejtori i Përgjithshëm i Policisë së Shtetit, Skënder Hita, ka kërkuar gjatë takimeve me drejtuesit vendorë dhe kufitarë një intensifikim të punës kundër krimit dhe rritje të kontrolleve nga strukturat e Policisë në Tiranë, Korçë dhe Dibër.

Theks i veçantë gjatë këtyre takimeve është vënë te goditja e grupeve kriminale, lufta kundër armëmbajtjes pa leje, trafikut të drogës, si dhe kapja e personave të shpallur në kërkim. Gjithashtu, Hita ka kërkuar hetime më të thelluara për frenimin e krimeve kufitare dhe trafikut të paligjshëm.

Në kuadër të afrimit të vitit të ri shkollor, një tjetër prioritet i vendosur në rendin e ditës ka qenë garantimi i sigurisë për nxënësit, përmes monitorimit të vazhdueshëm të zonave përreth shkollave dhe identifikimit të individëve që mund të përfshijnë të rinjtë në aktivitete kriminale.