Kursi i këmbimit të Euros me Lekun ka zbritur sot për herë të parë poshtë kufirit të 92 lekëve, duke prekur një minimum të ri historik. Sipas të dhënave zyrtare nga Banka e Shqipërisë, monedha europiane u këmbye këtë të premte me 91.94 lekë, duke thelluar më tej ciklin rënës që ka marrë ritme të përshpejtuara përgjatë vitit 2026. Që nga fillimi i vitit kalendarik, Euro është zhvlerësuar me 5%, ndërsa me bazë vjetore rënia arrin në 5.3%.

Ekspertët e tregut valutor bëjnë me dije se sezoni i zgjatur veror ka rritur me tej ofertën e bollshme të valutës në treg, ndërkohë që kërkesa për monedhën europiane mbetet e vakët. Ky zhvlerësim ka bërë që Euro të zëvendësohet pjesërisht nga leku vendas në disa prej transaksioneve të brendshme ekonomike, përfshirë edhe tregun e shitblerjes së pasurive të paluajtshme.

Factori kryesor pas këtij forcimi të monedhës kombëtare mbetet përmirësimi i ndjeshëm i Bilancit të Pagesave. Gjatë 6-mujorit të parë të vitit 2026, deficiti i llogarisë korrente pësoi një rënie prej 40.6%, duke zbritur në vlerën e 361 milionë eurove — niveli më i ulët i regjistruar që prej vitit 2018. Kjo ulje ka ardhur kryesisht si pasojë e rritjes së eksporteve të shërbimeve dhe hyrjeve nga remitancat. Bilanci në tregtinë e shërbimeve shënoi një nivel pozitiv prej 1.79 miliardë eurosh (+12.9%), ku më shumë se gjysma e kontributit erdhi nga turizmi, me 957 milionë euro të ardhura neto.

Një ndikim të drejtpërdrejtë ka dhënë edhe fluksi i investimeve të huaja direkte, të cilat për gjysmën e parë të vitit arritën në 1.144 miliardë euro (+50%). Vetëm në tremujorin e dytë u shënua një rritje prej 86%, e nxitur nga projekte madhore zhvillimore në sektorin e pasurive të paluajtshme, përfshirë investimet në bregdetin e Zvërnecit. Përqendrimi i lartë i këtyre flukseve valutore po vijon të mbajë nën presion kursin e këmbimit, duke zhvlerësuar më tej monedhën europiane kundrejt lekut.