PRISHTINË – Seanca plenare e Kuvendit të Kosovës është përfshirë nga tensionet dhe është ndërprerë, pasi Lëvizja Vetëvendosje (LVV) ka refuzuar të votojë Vlora Çitakun për postin e nënkryetares së Kuvendit, kandidate e propozuar nga Partia Demokratike e Kosovës (PDK).

Në vend të Çitakut, Kuvendi zgjodhi Ardian Golën nga radhët e LVV-së si nënkryetar. Pas rrëzimit të kandidaturës, kryetarja e Kuvendit, Albulena Haxhiu, i kërkoi PDK-së të paraqiste një propozim të ri, kërkesë e cila u kundërshtua ashpër nga deputetët e kësaj partie, të cilët në shenjë revolte braktisën sallën plenare, me përjashtim të deputetit Mërgim Lushtaku.

Reagimi i PDK-së dhe paralajmërimi për Gjykatën Kushtetuese

Pas daljes nga salla, kreu i PDK-së, Bedri Hamza, deklaroi se partia e tij nuk do të marrë më pjesë në seancat plenare dhe do t’i drejtohet zyrtarisht Gjykatës Kushtetuese. Hamza theksoi se afatet kushtetuese kanë përfunduar më 7 gusht dhe se aktgjykimi i Kushtetueses për mënyrën e votimit nuk po respektohet, pasi mungon konsensusi i kërkuar.

"Nga sot, PDK nuk ka arsye të marrë pjesë në seancën plenare dhe ne do ta dërgojmë lëndën në Gjykatën Kushtetuese. Jemi të sigurt që afatet kushtetuese kanë përfunduar më 7 gusht. Sot nuk po e respektojnë aktgjykimin e Kushtetueses për mënyrën e votimit, pasi aty thuhet se duhet të ketë konsensus. Nuk ka konsensus. Ne e votuam kandidatin e LVV, por ata nuk e mbështeten kandidaten tonë," u shpreh Hamza.