Qeveria ka prezantuar një reformë të re strehimi të fokusuar te të rinjtë dhe profesionistët, e cila parashikon vënien në dispozicion të 7 mijë apartamenteve, dhënien e 4 mijë kredive të buta – nga të cilat 2 mijë me zero interes për banesa deri në 60 mijë euro – si dhe subvencionimin e qirasë për 3 mijë apartamente të tjera.

Gjatë konferencës pas mbledhjes së qeverisë, ministrja e Ekonomisë, Delina Ibrahimaj, theksoi se paketa do të mbulohet nga Fondi Kombëtar i Strehimit dhe se zbatimi i saj nuk lidhet me qëllimet elektorale. Duke iu përgjigjur interesimit të gazetarëve se ku mund të gjenden banesa me këtë vlerë në Tiranë, ministrja u shpreh se bëhet fjalë për apartamente me sipërfaqe të vogla në periferi të kryeqytetit, të destinuara kryesisht për çifte dhe profesionistë të rinj.