TIRANË – Pas shkarkimit nga detyra e ministrit të Brendshëm, Besfort Lamallari ka reaguar duke falënderuar kryeministrin Edi Rama për besimin e dhënë gjatë viteve të tij në qeverisje.

Në fjalën e tij, Lamallari u shpreh se përvoja në detyrat e ndryshme shtetërore ka qenë e rëndësishme për formimin e tij profesional.

“Faleminderit shumë kryeministër për besimin në këto 10 vite. Do të thoja se jam rritur profesionalisht. Ka qenë një përvojë e jashtëzakonshme dhe jam munduar që të mos ju zhgënjej”, tha Lamallari.

Ai deklaroi gjithashtu se e konsideron një nder vijimin e bashkëpunimit me Ramën, tashmë në një tjetër funksion pranë Kryeministrisë.

“Është kënaqësi dhe nder të jem në krahun tuaj për të gjitha punët që e presin Shqipërinë”, u shpreh Lamallari.

Rama njoftoi më herët se Lamallari do të largohet nga drejtimi i Ministrisë së Brendshme për t’iu bashkuar ekipit të Kryeministrisë. Në vend të tij pritet të vijë Ervin Demo, i cili deri tani ka mbajtur postin e ministrit të Shtetit për Pushtetin Vendor.