Shqipëria po humbet popullsi dhe veçanërisht të rinj, por tkurrja e kësaj grup-moshe nuk po shoqërohet me një lehtësim të tregut të punës. Përkundrazi, të dhënat më të fundit të INSTAT tregojnë se numri i të papunëve të moshës 15-29 vjeç është rritur ndjeshëm gjatë tremujorit të dytë të vitit 2026, ndërsa punësimi i tyre ka rënë.

Më 1 janar 2026, popullsia banuese e Shqipërisë zbriti në 2,335,930 banorë, rreth 27.4 mijë më pak se një vit më parë. Tkurrja është edhe më e dukshme te moshat e reja. Krahasuar me vitin 2022, grup-mosha 15-29 vjeç është reduktuar me rreth 62 mijë persona, ose 13.4%.

Por, ndërsa numri i të rinjve po bie, numri i atyre që kërkojnë punë dhe nuk e gjejnë atë po rritet. Sipas të dhënave të INSTAT, në tremujorin e dytë të vitit 2026 rezultuan 36.7 mijë të papunë të moshës 15-29 vjeç, nga 31.6 mijë në të njëjtën periudhë të vitit 2025.

Brenda një viti janë shtuar më shumë se 5 mijë të rinj të papunë, duke shënuar një rritje prej 16.1%.

Në të njëjtën kohë, numri i të rinjve të punësuar ka shënuar rënie. Nga 177.4 mijë persona në tremujorin e dytë të vitit 2025, numri i të punësuarve të moshës 15-29 vjeç zbriti në 170.3 mijë në të njëjtën periudhë të vitit 2026. Kjo do të thotë rreth 7 mijë të punësuar më pak, ose një rënie prej 4%.

Edhe forca e punës në këtë grup-moshë, e cila përfshin të punësuarit dhe të papunët, ra lehtë, nga 209 mijë në 207 mijë persona.

Llogaritjet mbi të dhënat e INSTAT tregojnë se shkalla e papunësisë te të rinjtë u rrit në rreth 17.7% në tremujorin e dytë të vitit 2026, nga 15.1% një vit më parë. Kjo përfaqëson një përkeqësim me rreth 2.6 pikë përqindjeje.

Ecuria e të rinjve bie në kontrast me pjesën tjetër të tregut të punës. Numri i përgjithshëm i të papunëve në vend u ul me 4.2% brenda një viti, duke arritur në 104.6 mijë persona.

Edhe te grup-mosha 30-64 vjeç u regjistrua një përmirësim, me numrin e të papunëve që ra me 12.1%, ose rreth 9.2 mijë persona. Vetëm te të rinjtë tendenca ishte në drejtim të kundërt.

Si rrjedhojë, të rinjtë po zënë një pjesë gjithnjë e më të madhe të të papunëve në vend. Në tremujorin e dytë të vitit 2025, grup-mosha 15-29 vjeç përbënte rreth 29% të të papunëve gjithsej, ndërsa një vit më vonë kjo peshë u rrit në rreth 35%.

Problemet e të rinjve në tregun e punës lidhen edhe me mospërputhjen mes profileve që ofron sistemi arsimor dhe kërkesave të bizneseve. Në treg vërehet një numër i lartë të diplomuarish në degë tradicionale, ndërsa sektorët privatë raportojnë mungesë të specialistëve në fusha teknike, teknologji dhe zanate të specializuara.

Kjo situatë krijon një paradoks për ekonominë shqiptare: ndërsa vendi humbet mijëra të rinj përmes emigrimit, edhe ata që qëndrojnë përballen me vështirësi për të gjetur një vend pune të qëndrueshëm dhe në përputhje me kualifikimet e tyre.

Largimi i të rinjve, veçanërisht i atyre me arsim të lartë dhe aftësi profesionale, po ndikon jo vetëm në strukturën demografike të vendit, por edhe në tregun e punës. Në kushtet kur një pjesë e të rinjve vijon të shohë emigrimin si alternativë për mundësi më të mira, rritja e papunësisë në këtë grup-moshë mbetet një nga sfidat kryesore për ekonominë shqiptare.