Ish-presidenti i Kosovës, Hashim Thaçi, ka folur për herë të parë rreth rrethanave politike dhe historike që çuan në krijimin e Gjykatës Speciale në Hagë. Në një intervistë për emisionin "Top Story", Thaçi ka rrëfyer se në atë kohë Kosova ndodhej "mes dy zjarreve" dhe se vendimi për votimin e gjykatës nga Kuvendi ishte zgjedhja e "së keqes më të vogël".

Sipas Thaçit, shteti i Kosovës përballej me dy rrugë: të themelonte gjykatën në bashkëpunim me aleatët ndërkombëtarë, ose të lejonte që ajo të krijohej drejtpërdrejt nga Këshilli i Sigurimit i OKB-së. Ai nënvizoi se zgjedhja e bërë shmangu përfshirjen e drejtpërdrejtë të Rusisë dhe Kinës, çka do të përbënte një kthim prapa me pasoja të rënda legale, politike dhe historike për vendin.

Lideri i UÇK-së dhe ish-kreu i shtetit theksoi se vendimi i tij erdhi për të mbrojtur interesin e Kosovës, ndonëse sot po përballet personalisht me pasojat e asaj zgjedhjeje.

"Isha i zotuar nga ana ime të mos i ndodhte asgjë e keqe Kosovës. Tani jam duke paguar çmimin në lëkurën time. Por, kapërcen edhe kjo vështirësi," – u shpreh Thaçi, duke mbyllur mesazhin e tij nga Haga me besimin se kjo sfidë do të tejkalohet.