Gjykata e Apelit në Bolonjë ka rrëzuar vendimin e shkallës së parë, duke ulur nga 17 në 15 vite burg dënimin për autorin e vrasjes së 13-vjeçares shqiptare, Aurora Tila. Ngjarja e rëndë ndodhi më 25 tetor 2024 në Piacenza, ku e mitura humbi jetën pasi u hodh nga një ballkon.

Vendimi ka shkaktuar reagime të forta dhe pakënaqësi të thellë te familja e viktimës. Avokati mbrojtës i nënës, Emilio Malaspina, bëri të ditur se familjarët janë veçanërisht të zhgënjyer edhe nga qëndrimi i Zyrës së Prokurorisë së Përgjithshme, e cila kërkoi gjithashtu uljen e masës së dënimit për autorin, i cili në kohën e krimit ishte 15 vjeç.

Nëna e viktimës ka kritikuar ashpër sistemin e drejtësisë për lehtësi në dhënien e dënimeve ndaj autorëve të krimeve të tilla. Ajo ka paralajmëruar se vendime të kësaj natyre nuk ndihmojnë në parandalimin e femicideve, por përkundrazi rrezikojnë të inkurajojnë dhunën dhe autorët e mitur, nëse shteti nuk ndërhyn me masa më të forta dhe të duhura.