Kryeministri Edi Rama ka deklaruar se procesi i rindërtimit në Tiranë është zvarritur për shkak të situatës së krijuar në drejtimin e Bashkisë së Tiranës pas arrestimit të kryebashkiakut Erion Veliaj.

Gjatë fjalës së tij, Rama tha se qeveria, në bashkëpunim me Bashkinë e Tiranës, synon të përmbyllë sa më shpejt procesin e rindërtimit dhe t’u japë fund pritjeve të familjeve të prekura nga tërmeti i vitit 2019.

Kryeministri veçoi zonat e Kombinatit dhe 5 Majit, ku një pjesë e familjeve vijojnë të presin zgjidhjen përfundimtare për banesat e tyre.

Sipas Ramës, situata në Bashkinë e Tiranës ka ndikuar në vijimin normal të programeve të rindërtimit.

Rama: “Bashkisë së Tiranës iu pre koka”

Duke folur për situatën e krijuar në kryeqytet, Rama përdori një metaforë të fortë për të përshkruar mungesën e kryebashkiakut Erion Veliaj në drejtimin e bashkisë.

“Që kur Bashkisë së Tiranës iu pre koka për arsye që dihen dhe për mosarsye që nuk dihen, unë mendoj që viktimat e para dhe më të pafajshme të kësaj kokëprerjeje të padëgjuar në historinë e Bashkimit Europian dhe Europës dhe vendeve të Europës”, deklaroi Rama.

Kryeministri e cilësoi situatën si një eksperiment të pazakontë në drejtimin e një kryeqyteti dhe tha se pasojat janë ndjerë edhe te qytetarët.

“Eksperimenti social, legal, ekonomik, politik i drejtimit të një kryeqyteti pa kokë ka sjellë shumë viktima”, u shpreh ai.

Sipas Ramës, dëmet kanë prekur kategori të ndryshme sociale në Tiranë, ndërsa ndër më të prekurat janë familjet që vijojnë të presin përfundimin e rindërtimit.

“Familjet e prekura nga tërmeti janë viktimat më të pafajshme”

Rama tha se familjet që kanë humbur banesat nga tërmeti i vitit 2019 janë ndër qytetarët që kanë vuajtur më shumë nga zvarritja e procesit.

“E kanë paguar me dëme kolosale kategori sociale në Tiranë, ku më e prekura është ajo e familjeve që presin më në fund t’u jepet çelësi, sepse janë viktima të tërmetit”, tha kryeministri.

Ai shtoi se nuk bëhet fjalë vetëm për familjet e prekura nga tërmeti, por edhe për kategori të tjera qytetarësh që, sipas tij, janë përballur me pasojat e situatës së krijuar në drejtimin e kryeqytetit.

Rama e cilësoi këtë situatë si një “eksperiment jashtëzakonisht të rëndë dhe totalisht të dështuar”.

Rindërtimi, Rama premton përmbylljen e procesit

Kryeministri deklaroi se qeveria do të punojë me Bashkinë e Tiranës për të finalizuar procesin e rindërtimit në zonat ku ende ka familje në pritje.

Ai përmendi veçanërisht Kombinatin dhe zonën e 5 Majit, duke paralajmëruar një përshpejtim të procesit.

“Me Bashkinë e Tiranës do të finalizojmë shumë shpejt, nën udhëheqjen e ministrit të pushtetit vendor, planin për t’i dhënë fund historisë së pafundme dhe të pajustifikueshme të rindërtimit. Që nga Kombinati e deri te 5 Maji”, deklaroi Rama.

Formula 30-40-30 për banesat Në fjalën e tij, Rama prezantoi edhe formulën që, sipas tij, do të përdoret për zhvillimin e programeve të strehimit.

“Formula 30-40-40. Pra 30 social, 40 i përballueshëm dhe 30 të tjera shitje për të rigjeneruar para”, tha kryeministri.

Sipas tij, kjo skemë synon që paratë e rikthyera në sistem të përdoren për të financuar procese të tjera ndërtimi dhe rindërtimi.

Rama tha se synimi është që përmes kësaj formule të krijohet një mekanizëm i vazhdueshëm financimi për programet e strehimit dhe rindërtimit.

Në këtë kuadër, kryeministri u shpreh se familjet e prekura nga tërmeti duhet të marrin sa më shpejt çelësat e banesave të tyre, duke e cilësuar zvarritjen e procesit si të pajustifikueshme.

Deklaratat e Ramës vijnë në një moment kur situata e drejtimit të Bashkisë së Tiranës dhe pasojat e arrestimit të Erion Veliajt vijojnë të jenë në qendër të debatit politik, ndërsa qeveria kërkon të përshpejtojë proceset e mbetura të rindërtimit në kryeqytet.