Dëgjesa publike e organizuar në Rrajcë mbi Reformën e Re Territoriale është shoqëruar me tensione të shumta dhe është mbyllur para kohe, pas braktisjes nga ana e banorëve vendas. Takimi, i cili kiste si qëllim konsultimin me komunitetin mbi të ardhmen administrative të Bashkisë Prrenjas, degradoi në debate politike për shkak të qëndrimit të mbajtur nga përfaqësuesit e shumicës parlamentare.

Gjatë bashkëbisedimit, banorët e Rrajcës kërkuan një qëndrim të qartë nga deputetët e Partisë Socialiste të zonës, Bora Muzhaqi dhe Olsi Komici, lidhur me planin e ri të riorganizimit territorial. Komuniteti vendas shprehu shqetësimin se çdo variant që parashikon shkrirjen ose tjetërsimin e statusit të njësisë së tyre do të rriste izolidmin e zonës, do të largonte shërbimet publike nga qytetarët dhe do të zbehte përfaqësimin e tyre në vendimmarrjen lokale. Për banorët, ruajtja e funksionimit të autonomisë vendore dhe mbrojtja e identitetit gjeografik e ekonomik të Rrajcës mbeten prioritete të padiskutueshme.

Refuzimi i deputetëve Muzhaqi dhe Komici për t’u pozicionuar me një përgjigje të drejtpërdrejtë "pro" apo "kundër" u prit me reagime kritike nga të pranishmit. Ky qëndrim u interpretua nga komuniteti si një përpjekje për ta reduktuar konsultimin në një procedurë formale burokratike, pa marrë zotime konkrete politike përpara elektoratit.

Në mbështetje të kërkesave të banorëve u rreshtuan deputetët e Partisë Demokratike të pranishëm në takimin konsultativ, të cilët deklaruan qëndrimin e tyre kundër çdo opsioni që parashikon shkrirjen e bashkisë apo zbehimin e funksioneve të saj.

Të zhgënjyer nga mungesa e transparencës dhe refuzimi i përfaqësuesve të shumicës për të mbajtur një qëndrim të qartë publik, banorët e cilësuan dëgjesën të pavlefshme dhe u larguan masivisht nga salla.