Policia e Gjirokastrës, në bashkëpunim me autoritetet doganore të pikës kufitare të Kakavijës dhe Autoritetin Kombëtar UShqimor (AKU), ka finalizuar operacionin e koduar “Ngarkesat”, duke goditur një rast të kontrabandës dhe shkeljes së standardeve të sigurisë ushqimore.

Si rezultat i kontrolleve të imtësishme me skaner në vijën e dytë në hyrje të vendit, në dy autobusë të linjave “Athinë-Gjirokastër” dhe “Athinë-Shkodër” u zbuluan 31 pako me mish dhe peshk të transportuara në kundërshtim të plotë me kriteret higjieno-sanitare. Produktet rezultuan pa dokumentacion tatimor, duke u futur në mënyrë të paligjshme nga Greqia.

Për këtë rast u arrestuan në flagrancë drejtuesit e mjeteve, shtetasit A.B., 54 vjeç, dhe K.M., 46 vjeç. Materialet procedurale i kanë kaluar Prokurorisë për veprat penale “Kontrabanda me mallra të tjera” dhe “Importimi, prodhimi, shitja dhe ruajtja e ushqimeve të rrezikshme për shëndetin ose jetën e njerëzve”.