Gjatë mbledhjes së jashtëzakonshme të gjyqtarëve kushtuar ngërçit të pagave, kryetari i Gjykatës së Lartë, Sokol Sadushi, ka deklaruar prerë se mosveprimi i Kuvendit nuk i jep të drejtë ekzekutivit të pezullojë efektet e një vendimi të Gjykatës Kushtetuese. Ai theksoi se vendimet përfundimtare të drejtësisë nuk janë subjekt dëshire, por detyrim për t’u zbatuar.

Sadushi u ndal te parimi i ndarjes së pushteteve, duke kujtuar se marrëdhënia mes tyre duhet të bazohet te respekti reciprok dhe jo te nënshtrimi. Sipas tij, në një shtet të së drejtës organet shtetërore i nënshtrohen vendimeve gjyqësore dhe jo e kundërta, ndërsa sjellja e institucioneve ndaj këtyre vendimeve tregon nivelin e kulturës kushtetuese dhe evropiane të vendit.

Kreu i Gjykatës së Lartë shtoi gjithashtu se kritika ndaj gjykatave është legjitime, por ajo nuk duhet të kalojë në denigrim apo përpjekje për të dobësuar sistemin e drejtësisë, pasi ruajtja e një gjyqësori të pavarur është garanci për të gjithë.