Sistemi gjyqësor në vend vijon të përballet me bllokim dhe tensione, pasi gjyqtarët mblidhen sot në orën 10:00 në një takim të përgjithshëm pranë Këshillit të Lartë Gjyqësor për të diskutuar situatën e krijuar me pagat.

Pezullimi i shërbimeve nga administrata dhe sekretaritë ka përfshirë Gjykatën e Tiranës, atë të Vlorës, Fierit dhe Lushnjës, të cilat kërkojnë kalimin e pagave të muajit gusht sipas nivelit të ri. Ndërkohë, çështja ka shkaktuar përplasje politike mes mazhorancës dhe opozitës në Konferencën e Kryetarëve, ndërsa pritet që nisma të votohet më 17 shtator.

Situata vjen pas deklaratës së Gjykatës Kushtetuese më 7 shtator, e cila i kujtoi Kuvendit detyrimin për të zbatuar vendimin e saj të 17 shkurtit lidhur me pagat në sistemin e drejtësisë, kompetencë për të cilën mazhoranca argumenton se i takon Kuvendit.