Autoritetet greke, në bashkëpunim të ngushtë me agjentët e DEA-s amerikane, kanë finalizuar një operacion antidrogë në aeroportin "Eleftherios Venizelos" të Athinës, ku u sekuestruan rreth 100 kilogramë kokainë. Lënda narkotike ishte fshehur me mjeshtëri brenda një ngarkese me trëndafila të freskët të nisur nga Kolumbia.

Gjatë operacionit të zhvilluar mbrëmjen e së mërkurës, policia arrestoi gjashtë persona, mes të cilëve dyshohet se ka edhe shtetas shqiptarë të përfshirë në këtë rrjet trafiku.

Sipas hetimeve paraprake, metoda e kamuflimit mes luleve u përdor për të shmangur kontrollet doganore dhe për të futur drogën në territorin grek. Autoritetet vijojnë hetimet intensive për të zbuluar destinacionin final të ngarkesës dhe për të identifikuar anëtarët e tjerë të këtij grupi kriminal ndërkombëtar.