TIRANË — Mungesa e thellë e fuqisë punëtore dhe vala e emigracionit kanë përfshirë edhe sektorin e kujdesit social në Shqipëri, duke i detyruar qendrat private për të moshuarit të kërkojnë staf jashtë vendit për të plotësuar vakancat e kujdestarëve dhe mjekëve geriatër.

Përballë vështirësive në gjetjen e punonjësve vendas, drejtuesit e këtyre qendrave po orientohen drejt tregjeve të huaja. Hysni Kuka, administrator i një qendre rezidenciale për të moshuarit në Tiranë, ka bërë të ditur për revistën Monitor se po shqyrton mundësinë e angazhimit të dy shtetasve nga Filipinet. Një nismë e ngjashme po ndiqet edhe nga një qendër në zonën e Saukut, e cila po vlerëson punësimin e dy infermiereve nga Tunizia, të cilat kanë pasur më parë eksperiencë pune në sektorin e shërbimeve gjatë sezonit turistik në vend.

Megjithatë, ky proces po shoqërohet me sfida dhe pikëpyetje nga ana e administratorëve, të cilët shprehen skeptikë për shkak të mosnjohjes së gjuhës shqipe, procedurave burokratike të punësimit, si dhe mungesës së qëndrueshmërisë në afatgjatë të stafit të huaj.

Përpjekjet e qendrave private vijnë në një kohë kur pagat neto për kujdestarët variojnë nga 55 mijë deri në 70 mijë lekë në muaj për një orar standard prej 8 orësh, ndërsa tarifat mujore për akomodimin e të moshuarit nisen nga 70 mijë deri në 120 mijë lekë, në varësi të gjendjes së tij shëndetësore.

Prirja e punësimit të shtetasve të huaj nuk është më një dukuri e izoluar, por një trend në rritje të shpejtë në ekonominë shqiptare. Të dhënat zyrtare nga Regjistri Elektronik për to Huajt tregojnë se deri në qershor të vitit 2026, numri i të huajve të punësuar në Shqipëri ka arritur në 22,6 mijë persona, nga 18,1 mijë që ishte në fund të vitit 2025.

Rreth 90% e tyre janë të pajisur me leje unike si punëmarrës, ku në krye të listës për sa i takon shtetësisë renditen shtetasit nga Filipinet me 3,552 leje pune (rreth 16% e totalit), të ndjekur nga indianët me 3,423 të punësuar dhe egjiptianët me 3,283 të tillë. Përveç kujdesit për të moshuarit, shtetasit e huaj, sidomos nga Filipinet, po integrohen gjithnjë e më shumë në familjet shqiptare si dado për fëmijë apo staf mirëmbajtjeje shtëpish.