Një aksident i rëndë hekurudhor është regjistruar të mërkurën në Poloni, ku një tren pasagjerësh u përplas me një betoniere dhe doli nga shinat. Si pasojë e përplasjes, të paktën një person ka humbur jetën dhe 20 të tjerë janë plagosur, ndërsa katër prej tyre raportohet se ndodhen në gjendje të rëndë.

Aksidenti ndodhi rreth orës 11:25, pranë Sokolniki Suche, në rajonin e Przysuchës, rreth 100 kilometra në jug të Varshavës. Treni po udhëtonte nga Lublini drejt Szczecinit.

Sipas operatorit hekurudhor PKP Intercity, treni “Koziołek” përbëhej nga gjashtë vagona dhe një lokomotivë dhe kishte rreth 120 pasagjerë në bord. Pas përplasjes, treni u përmbys pjesërisht, ndërsa disa vagona dolën nga shinat.

Mes personave të plagosur rëndë janë shoferi i betonieres dhe drejtuesi i trenit. Ky i fundit mbeti i bllokuar pas përplasjes dhe u nxor nga zjarrfikësit.

Në operacionin e shpëtimit u angazhuan rreth 30 brigada zjarrfikëse dhe dy helikopterë shpëtimi.

Për shkak të aksidentit, trafiku hekurudhor në linjën 22, në segmentin Wolanów–Przysucha, është pezulluar. Autoritetet kanë nisur hetimet për të përcaktuar shkaqet dhe rrethanat e përplasjes.

🚨Wykolejenie pociągu Intercity pod Przysuchą

9 września 2026 r. w Sokolnikach Suchych koło Przysuchy wykoleił się pociąg Intercity „Koziołek” relacji Lublin Główny – Szczecin Główny. Samochód ciężarowy wjechał pod skład na przejeździe kolejowym. Wykoleiła się lokomotywa i… pic.twitter.com/KwLyreFxkQ

— Codziennik z Mordoru (@mordownik4u) September 9, 2026