Këngëtari i njohur grek Giorgos Mazonakis është ndarë nga jeta këtë të mërkurë, në moshën 54-vjeçare, pas një arresti kardiak.

Sipas raportimeve të mediave greke, Mazonakis pësoi arrest kardiak dhe ekipet e emergjencës ndërhynë menjëherë. Një punonjës i EKAB mbërriti në vendngjarje me motoçikletë dhe nisi reanimimin kardiopulmonar.

Pak minuta më vonë, këngëtari u transportua me ambulancë drejt Spitalit Elpis, ku ekipet mjekësore vijuan përpjekjet për ta rikthyer në jetë. Pavarësisht ndërhyrjes, mjekët nuk arritën ta shpëtonin dhe konfirmuan vdekjen e tij.

Giorgos Mazonakis ishte një prej emrave më të njohur të muzikës greke dhe një figurë e rëndësishme e skenës muzikore të vendit. Ai lindi në mars të vitit 1972 në Nikaia dhe e nisi karrierën profesionale në vitin 1992, në moshën 20-vjeçare.

Gjatë karrierës së tij, Mazonakis publikoi një sërë këngësh të suksesshme, disa prej të cilave janë të njohura edhe për publikun shqiptar, mes tyre “Savvato”, “Zilevo” dhe “To Gucci Forema”.