Kina do të vazhdojë të zgjerojë në mënyrë aktive hapjen dhe do të marrë masa më konkrete për të lehtësuar investimet e huaja, tha të martën zëvendëspresidenti Han Zheng gjatë fjalës së tij në ceremoninë e hapjes së Panairit të 26-të Ndërkombëtar për Investimet dhe Tregtinë (CIFIT) në qytetin bregdetar lindor të Xiamen-it.

Ndërsa bota ka hyrë në një periudhë të re turbullirash e transformimesh, me pasiguri dhe faktorë destabilizues në rritje, prirja historike e hapjes dhe e bashkëpunimit mbetet e pandryshuar, u shpreh Han, duke shtuar se CIFIT është më i rëndësishëm se kurrë.

Zv.presidenti shprehu shpresën se kompanitë nga e tërë bota do të shfrytëzojnë mundësitë e krijuara nga hapja dhe zhvillimi i vendit, do të vazhdojnë të thellojnë praninë e tyre në tregun vendas dhe do të punojnë për të arritur përfitime të përbashkëta.

Ai vuri në dukje se vendi është i përkushtuar që të forcojë bashkëpunimin ndërkombëtar në risitë shkencore, teknologjike e industriale, bazuar në plotësueshmërinë, barazinë dhe përfitimet e përbashkëta.

"Kina është e gatshme të punojë me të gjitha palët për të nxitur e mbrojtur një ekosistem të hapur global inovacioni dhe për të kultivuar së bashku nxitësit e rinj të rritjes me përfitime për mbarë botën, si edhe për të promovuar zhvillimin më të qëndrueshëm, më të lirshëm e më përfshirës të zinxhirëve globalë industrialë e të furnizimit, përballë rritjes së proteksionizmit tregtar e rreziqeve gjeopolitike, duke mbrojtur së bashku sistemin tregtar shumëpalësh", – shtoi Han.

Panairi i sivjetshëm ka tërhequr më shumë se 1 200 institucione qeveritare zyrtare dhe delegacione biznesi nga 129 vende e rajone, si edhe 30 organizata ndërkombëtare.