Policia e Tiranës ka shoqëruar katër persona në kuadër të hetimeve për shpërthimin e fuqishëm të ndodhur mëngjesin e sotëm në një pikë karburanti në zonën e Brrylit.

Të shoqëruarit janë drejtuesi i automjetit që po furnizohej me gaz në momentin e ngjarjes, menaxheri i pikës, administratori dhe drejtuesi teknik. Veprimet proceduriale po kryhen për zbardhjen e plotë të rrethanave dhe përcaktimin e përgjegjësive ligjore për incidentin, i cili përveç dëmeve të konsiderueshme materiale, solli edhe plagosjen e tre punonjësve.

Sipas të dhënave paraprake nga strukturat e Policisë, dyshohet se shpërthimi ndodhi gjatë procesit të furnizimit të mjetit me gaz, në një kohë kur në mjediset e pikës kishte pasur rrjedhje të lëndës djegëse.

Tre punonjësit e karburantit që mbetën të lënduar u dërguan menjëherë për ndihmë mjekësore në Spitalin Universitar të Traumës. Sipas njoftimeve zyrtare të Ministrisë së Shëndetësisë, gjendja e tyre shëndetësore është e stabilizuar dhe aktualisht ndodhen jashtë rrezikut për jetën.