Pas plagosjes së 28-vjeçarit në këmbë dhe largimit nga vendngjarja, 30-vjeçari u vetëdorëzua bashkë me armën e dyshuar të krimit. Në banesë dhe automjet iu gjetën edhe armë e pajisje të tjera

Kukës – Është vetëdorëzuar në Kukës 30-vjeçari i dyshuar për plagosjen me armë të një të riu një ditë më parë në Krumë.

I dyshuari, Fatjon Dauti, rreth 30 vjeç, banues në Krumë, është paraqitur së bashku me pistoletën që dyshohet se është përdorur gjatë ngjarjes.

Plagosja ndodhi më 8 shtator, në rrugën e njohur si “Kryqëzimi i Spitalit”, ku pas një konflikti për motive të dobëta, Fatjon Dauti dyshohet se qëlloi me armë zjarri në këmbë Jakup Aga, 28 vjeç.

I plagosuri ndodhet jashtë rrezikut për jetën.

Pas të shtënave, autori i dyshuar u largua nga vendi i ngjarjes, ndërsa më pas, pas kontakteve me familjarët, vendosi të vetëdorëzohej.

Gjatë kontrollit në automjetin dhe banesën e tij janë gjetur e sekuestruar edhe një armë zjarri kallashnikov, një dylbi, një jelek antiplumb dhe municion luftarak.

30-vjeçari është arrestuar për “Plagosje të rëndë me dashje” dhe “Mbajtje pa leje të armëve dhe municioneve luftarake”.

Hetimet vijojnë për të dokumentuar plotësisht rrethanat e konfliktit dhe përdorimin e armëve të sekuestruara. /noa.al