Vala e shpërthimit dëmtoi ambientet e zyrave dhe hodhi materiale deri në rrugë. Dyshimet e para lidhen me gazin ose avujt e benzinës

Tiranë – Detaje të reja janë mësuar për shpërthimin e ndodhur mëngjesin e sotëm në një pikë karburanti pranë Brrylit, në Tiranë, ku tre punëtorë mbetën të dëmtuar.

Sipas të dhënave paraprake, shpërthimi dyshohet se ka ndodhur në ambientet e zyrave të karburantit, të cilat janë dëmtuar rëndë.

Shefi i repartit zjarrfikës, Shkëlqim Goxhaj, deklaroi se pjesa e përparme e zyrave është dëmtuar nga vala e shpërthimit dhe materiale të ndryshme janë përhapur deri në rrugë.

Pas shpërthimit ka vijuar një rrjedhje gazi, e cila ka mbajtur flakët ndezur për disa minuta.

Zjarrfikësit kanë ndërprerë furnizimin me gaz duke mbyllur rubinetin përkatës, çka bëri të mundur izolimin e flakëve dhe vënien e situatës nën kontroll.

Sipas Goxhajt, nuk bëhej fjalë për një zjarr të përmasave të mëdha, por kryesisht për një shpërthim, i ndjekur nga flakë të shkaktuara prej rrjedhjes së gazit.

Sa i përket shkakut, ende nuk ka një përfundim zyrtar.

Dyshimet e para janë se shpërthimi mund të jetë shkaktuar nga gazi ose nga avujt e benzinës.

Nga ngjarja janë dëmtuar tre punëtorë të pikës së karburantit, të cilët kanë marrë ndihmë mjekësore.

Ekspertiza pritet të përcaktojë shkakun e saktë të shpërthimit. /noa.al