Shqipëria ka reaguar ndaj nderimeve shtetërore të bëra në Serbi për Ratko Mlladiç, ish-komandantin e serbëve të Bosnjës, i dënuar përfundimisht për gjenocid, krime kundër njerëzimit dhe krime lufte.

Ministri për Evropën dhe Punët e Jashtme, Ferit Hoxha, deklaroi në rrjetin social X se Shqipëria i bashkohet Bashkimit Evropian dhe liderëve të tij në dënimin e mënyrës se si Mlladiçi është glorifikuar në Serbi.

Hoxha theksoi se qëndrimi i Shqipërisë kundër glorifikimit të kriminelëve të luftës, mohimit të gjenocidit dhe revizionizmit historik mbetet i pandryshuar. Sipas tij, akte të tilla bien ndesh me vlerat europiane dhe dëmtojnë procesin e pajtimit, bashkëpunimit dhe fqinjësisë së mirë në Ballkanin Perëndimor.

Në reagimin e tij, ministri nënvizoi se nderimi i Mlladiçit fyen viktimat dhe të mbijetuarit, ndërsa dëmton besimin mes komuniteteve dhe vendeve të rajonit.

Hoxha argumentoi se pajtimi i qëndrueshëm në Ballkan mund të ndërtohet vetëm mbi të vërtetën, llogaridhënien dhe respektin për viktimat, duke e lidhur këtë proces edhe me perspektivën europiane të rajonit.

Reagimi i Tiranës vjen një ditë pas nderimeve të raportuara në Serbi, duke e vendosur Shqipërinë në të njëjtën linjë me reagimet europiane ndaj glorifikimit të figurave të dënuara për krime të rënda gjatë luftërave në ish-Jugosllavi.