Deputeti socialist Erion Braçe ka reaguar pas akuzave të ish-zëvendëskryeministrit Arben Ahmetaj për një skemë të dyshuar të trafikut ndërkombëtar të armëve.

I ftuar në News24, Braçe tha se nuk ishte në dijeni të detajeve të deklaratave të Ahmetajt, por theksoi se çdo qytetar ka të drejtë dhe përgjegjësi të denoncojë një fakt që mund të përbëjë vepër penale.

Sipas tij, nëse organet ligjzbatuese disponojnë fakte dhe prova që lidhen me një vepër penale, ato mund të nisin edhe një hetim kryesisht.

Braçe solli në vëmendje edhe periudhën kur Shqipëria ndodhej në opozitë, duke folur për çështjen e trafikut të armëve dhe lidhjet e saj me vendet në konflikt.

“Në konceptin tim, apo me aq sa e njoh unë çështjen e trafikut të armëve, nisur nga periudha kur kemi qenë në opozitë, trafiku i armëve është lidhur me vende në konflikt dhe ku shitja e armëve ka qenë e ndaluar me rezoluta të OKB-së. Fjala bie, në atë periudhë ne kemi shitur armë në Ruandë”, deklaroi Braçe.

Ai përmendi gjithashtu Serbinë, duke pretenduar se ky shtet kishte përfituar nga kjo situatë, si në aspektin e furnizimit me naftë, ashtu edhe në atë të armatimit.

“Serbia ka qenë një nga vendet që ka përfituar pa masë nga kjo histori, qoftë me naftën, qoftë me armatimin.”

Braçe tha se nuk e di nëse Ahmetaj i referohet së njëjtës linjë të pretenduar trafiku, por nënvizoi se çdo person që vihet në dijeni të një fakti që mund të përbëjë krim duhet ta denoncojë atë.

“Nuk e di nëse zotëria ka parasysh këtë linjë të trafikut apo jo. Çdokush në këtë vend ka një të drejtë kushtetuese dhe legjitime që të kallëzojë. Kur bie në dijeni të një fakti të një krimi, qoftë edhe trafiku i armëve, duhet bërë kallëzim.”

Sipas deputetit socialist, në rast se ekzistojnë elementë të një vepre penale, të mbështetur në fakte dhe prova, organet ligjzbatuese kanë mundësinë të nisin një hetim kryesisht.