Drejtori i Përgjithshëm i Policisë së Shtetit, Skënder Hita, zhvilloi këtë të martë një takim me drejtuesit dhe strukturat e Drejtorisë Vendore të Policisë Shkodër, ku në fokus ishte analiza e situatës kriminale dhe efektiviteti i punës së policisë në qark.

Gjatë mbledhjes, Hita ka shprehur pakënaqësi për rezultatet e arritura nga strukturat vendore, duke kërkuar rritjen e efektivitetit dhe rezultate më konkrete në përballjen me kriminalitetin.

Sipas informacioneve të bëra publike nga takimi, një prej shqetësimeve kryesore lidhet me nivelin e zbulueshmërisë së vrasjeve, aktivitetin e grupeve kriminale, si dhe kultivimin dhe trafikimin e kanabisit.

Në diskutim kanë qenë edhe problematikat që lidhen me trafikun rrugor, ndërsa një tjetër prioritet ka qenë garantimi i sigurisë në institucionet arsimore, në prag të nisjes së vitit të ri shkollor.

Hita u ka kërkuar strukturave vendore të intensifikojnë punën për goditjen e grupeve kriminale dhe zbardhjen e ngjarjeve kriminale, veçanërisht rasteve të vrasjeve. Po ashtu, është kërkuar forcimi i masave për parandalimin dhe goditjen e kultivimit të lëndëve narkotike.

Takimi u zhvillua në një ditë kur Shkodra u trondit nga vrasja e 24-vjeçarit Ylber Luli. Në lidhje me ngjarjen, Policia e Shkodrës ka arrestuar Andri Vulajn, i dyshuar si autor i krimit.

Mbledhja e Drejtorit të Përgjithshëm të Policisë së Shtetit me strukturat vendore në Shkodër zgjati më shumë se një orë.

Takimi ishte pjesë e një serie mbledhjesh që Hita po zhvillon në qarqe të ndryshme të vendit me drejtuesit vendorë dhe strukturat e Policisë së Shtetit. Në qendër të këtyre takimeve janë analiza e punës së strukturave policore, përcaktimi i detyrave dhe kërkesa për rezultate më të larta në parandalimin dhe goditjen e kriminalitetit.