Muhamed Sylisufaj, 59 vjeç, humbi jetën, ndërsa Albert Dunisha, Ilir Dautaj dhe Afrim Aliaj mbetën të plagosur rëndë pasi shtylla e ndriçimit preku telat e energjisë elektrike

Tropojë – Kanë dalë emrat e katër punonjësve të Bashkisë Tropojë të përfshirë në ngjarjen e rëndë të ndodhur paraditen e sotme pranë fshatit Bujan, ku një shtyllë ndriçimi preku telat e energjisë elektrike.

Viktima është Muhamed Sylisufaj, 59 vjeç, i cili humbi jetën si pasojë e kontaktit me rrymën elektrike.

Të plagosur rëndë kanë mbetur Albert Dunisha, 40 vjeç, Ilir Dautaj, 47 vjeç dhe Afrim Aliaj, 21 vjeç.

Ngjarja ndodhi rreth orës 10:00, në rrugën e Dobravës, ndërsa katër punonjësit po kryenin punime për shpërndarjen dhe vendosjen e shtyllave të ndriçimit.

Sipas të dhënave paraprake, gjatë vendosjes së një shtylle në bazament, për shkak të peshës së saj punonjësit kanë humbur ekuilibrin. Shtylla ka prekur telat e energjisë elektrike, duke përcjellë rrymën te personat që po e mbanin.

Muhamed Sylisufaj nuk ka mundur të mbijetojë, ndërsa tre kolegët e tij janë dërguar për ndihmë mjekësore.

Punonjësit po kryenin detyrën sipas planit të punës të Bashkisë Tropojë, të datës 4 shtator 2026.

Hetimet vijojnë për të sqaruar plotësisht rrethanat e ngjarjes dhe mënyrën se si ndodhi aksidenti.