SHKODËR — Zbardhen detaje të reja nga ngjarja e rëndë e regjistruar mëngjesin e kësaj të marte në Shkodër, ku mbeti i vrarë 24-vjeçari Ylber Luli. Sipas të dhënave paraprake nga hetimet, shkaku i nisjes së konfliktit mes viktimës dhe autorit të dyshuar ka qenë një banalitet.

Përplasja mes 25-vjeçarit Andri Vulaj dhe Ylber Lulit dyshohet se ka filluar në zonën e Gjuhadolit, pasi dy të rinjtë janë konfliktuar verbalisht për shkak të një vështrimi mes tyre. Pas këtij momenti, situata është përshkallëzuar kur Andri Vulaj është shfaqur pranë banesës së 24-vjeçarit, ku është përfshirë në një përleshje fizike me Ylberin dhe babanë e tij, 63-vjeçarin Qamil Luli.

Gjatë dëshmisë së tij paraprake dhënë autoriteteve, Andri Vulaj ka pretenduar se ka vepruar në kushtet e vetëmbrojtjes. Ai ka deklaruar se gjatë konfliktit në banesë është sulmuar fillimisht me thikë nga babë e bir, çka e ka detyruar të nxjerrë armën e zjarrit dhe të qëllojë.

Si pasojë e të shtënave, një plumb ka goditur në kraharor 24-vjeçarin Ylber Luli. Edhe pse u transportua menjëherë drejt spitalit, i riu nuk mundi t’u mbijetojë plagëve të rënda dhe ndërroi jetë. Gjatë përplasjes fizike kanë mbetur të plagosur edhe vetë autori i dyshuar, Andri Vulaj, si dhe babai i viktimës, Qamil Luli, të cilët ndodhen jashtë rrezikut për jetën.

Policia e Shkodrës ka bërë arrestimin e 25-vjeçarit Andri Vulaj dhe ka sekuestruar armën e zjarrit të përdorur në krim. Grupi hetimor, nën drejtimin e Prokurorisë, vijon veprimet për të dokumentuar plotësisht dinamikën e ngjarjes dhe për të përcaktuar përgjegjësitë ligjore të secilit prej personave të përfshirë.