TIRANË — Një grup i vogël qytetarësh dhe protestuesish janë mbledhur paraditen e kësaj të marte para godinës së Kryesisë së Kuvendit, në kohën kur aty po pritej të niste mbledhja e Konferencës së Kryetarëve.

Të pranishmit kanë lëshuar thirrje të ashpra ndaj institucionit dhe deputetëve, duke bërtitur parulla si "Ju jeni Kryesia e turpit" dhe "Turp, parlamenti i krimit", ndërsa u kanë bërë thirrje ligjvënësve të tregojnë dinjitet në detyrë.

Për të shmangur tensionet dhe për të garantuar rendin e sigurinë pranë perimetrit të institucionit, forcat e policisë kanë ndërhyrë menjëherë, duke i spostuar protestuesit nga hyrja e godinës.