TIRANË — Ngërçi financiar në sistemin e drejtësisë ka sjellë bojkotimin e parë të shërbimeve nga administrata gjyqësore. Punonjësit dhe sekretarët e Dhomës Civile të Gjykatës së Tiranës kanë ndërprerë punën këtë të martë, duke kërkuar zgjidhje të menjëhershme për moskalimin e pagave të muajit gusht.

Administrata ka njoftuar zyrtarisht kryetarin e Gjykatës për vendimin e bojkotit, ndërsa stafit i është komunikuar se një vendim apo qëndrim zyrtar do të dalë pas mbledhjes urgjente të kryetarëve të të gjitha gjykatave, e cila është parashikuar të mbahet në orën 15:00 pranë Gjykatës së Lartë. Paralelisht, për të trajtuar të njëjtin problem, Prokurori i Përgjithshëm Olsian Çela ka thirrur në një takim drejtuesit e prokurorive të rretheve, Shoqatën e Prokurorëve dhe anëtarët e KLP-së.

Zanafilla e ngërçit institucional:

Mungesa e miratimit në Kuvend: Konflikti lindi pasi Kuvendi nuk miratoi brenda afatit të 31 korrikut formulën e re për pagat e magjistratëve, siç kishte kërkuar më parë Gjykata Kushtetuese.

Vendimi i KLGJ dhe KLP: Pas kalimit të afatit, Këshilli i Lartë Gjyqësor dhe Këshilli i Lartë i Prokurorisë vendosën të zbatojnë vetë vendimin e Kushtetueses, duke përcaktuar pagën e re referuese në 222,425 lekë (nga 156,800 lekë që ishte), plus shtesën e kualifikimit prej 14 mijë lekësh.

Bllokimi në Thesar: Ministria e Financave refuzoi të ekzekutojë listëpagesat me rritje, duke argumentuar se përcaktimi i pagave është kompetencë e Kuvendit, dhe kërkoi kthimin e tyre te metodologjia e vjetër. Për pasojë, pa paga kanë mbetur jo vetëm magjistratët, por e gjithë administrata e gjykatave dhe prokurorive.

Kryeministri Edi Rama deklaroi dy ditë më parë se "dera e Thesarit të Shtetit" nuk mund të hapet me forcë, ndërsa ministri i Drejtësisë, Toni Gogu, ka paralajmëruar se situata do të marrë zgjidhje në Kuvend me hapjen e sesionit të ri parlamentar.