TIRANË — Përfundon këtë të martë raundi i parë i regjistrimeve në universitetet e vendit, ndërsa procesi i zhvilluar përmes portalit zyrtar U-Albania u ka dhënë mundësi maturantëve të ndjekin në kohë reale ecurinë e vijës së kuqe dhe përzgjedhjen e degëve bazuar në meritë.

Sipas drejtorit të Përgjithshëm të Rrjetit Akademik Shqiptar, Arjan Xhelaj, informimi më i mirë i maturantëve ndër vite ka sjellë një rënie të ndjeshme të numrit të çregjistrimeve. Megjithatë, pas mbylljes zyrtare të këtij raundi, maturantët që kanë ndryshuar mendje për programin e studimit ku janë regjistruar kanë në dispozicion një afat të prerë prej 24 orësh për të kryer procesin e çregjistrimit. Të dhënat zyrtare tregojnë se në vitet e shkuara më pak se 1% e studentëve të rinj kanë zgjedhur të çregjistrohen në këtë fazë.

Hapat e ardhshëm dhe Formuari A2:

Riaplikimet (15–17 shtator): Maturantët që nuk mundën të siguronin një vend në raundin e parë, si dhe ata që kanë kaluar provimet e Maturës Shtetërore në sesionin e vjeshtës, do të mund të aplikojnë sërish përmes portalit U-Albania në datat 15, 16 dhe 17 shtator.

Procesi administrativ: Për maturantët që aplikojnë për herë të parë me formularin A2, afati administrativ mbetet i hapur deri më 15 shtator, duke i hapur rrugë fazave pasardhëse të regjistrimeve në institucionet e arsimit të lartë.