Ish-zëvendëskryeministri Arben Ahmetaj ka ngritur akuza ndaj Kryeministrit Edi Rama dhe kryebashkiakut të Tiranës, Erion Veliaj, lidhur me çështjen e inceneratorëve dhe aferën e njohur si “5D”.

Në një intervistë në emisionin “Çim Peka Live”, Ahmetaj deklaroi se nuk ka pasur rol si autoritet kontraktor apo në procedurat e tenderimit për inceneratorin e Elbasanit. Ai mohoi gjithashtu të ketë zhvilluar tendera gjatë kohës që ka mbajtur detyra publike.

Duke folur për çështjen e inceneratorëve, Ahmetaj ia atribuoi Ramës nismën për krijimin e tyre dhe pretendoi se ai është përdorur si “kokë turku” në këtë çështje.

“Nuk kam qenë asnjëherë as autoritet kontraktor, as vlerësues, as tenderues për inceneratorin e Elbasanit. Nuk kam bërë asnjë tender në jetë. Janë 17 vendime fap e fap. Pse më akuzojnë për korrupsion? Inceneratorët i ka bërë kreu i organizatës. Ai donte kokë turku”, deklaroi Ahmetaj.

Ish-zëvendëskryeministri foli më tej edhe për aferën “5D”, duke pretenduar se ajo lidhet drejtpërdrejt me kryebashkiakun Erion Veliaj.

Sipas Ahmetajt, ditën kur u firmos urdhër-arresti ndaj tij, Veliaj ka festuar me disa prej drejtorëve të Bashkisë së Tiranës, të cilët më pas, sipas tij, u përdorën si “koka turku”.

“Është fakt që Erion Veliaj, ditën që ka dalë firma e arrestit për mua, ka hapur një shishe uiski me drejtorët e vet, të cilët i bëri të gjithë koka turku sepse ‘5D’ është vepër e Veliajt”, u shpreh Ahmetaj.

Ai shtoi se, sipas tij, Veliaj do të kishte festuar sërish në rast se ai do të përfundonte në burg.

Deklaratat e Arben Ahmetajt janë akuza dhe vlerësime të tij lidhur me çështjet e inceneratorëve dhe “5D”. Përgjegjësia ligjore e personave të përmendur përcaktohet nga organet kompetente të drejtësisë dhe nga vendimet përfundimtare të gjykatave.