RUSI – Rusia ka vendosur të mbyllë Konsullatën e Përgjithshme të Gjermanisë në Shën Petersburg, në një tjetër përshkallëzim të marrëdhënieve diplomatike mes Moskës dhe Berlinit.

Vendimi i autoriteteve ruse vjen si kundërpërgjigje ndaj masave të marra nga Gjermania, e cila njoftoi më herët mbylljen e Konsullatës së Përgjithshme Ruse në Bon dhe të një qendre kulturore ruse në Berlin.

Sipas Ministrisë së Jashtme ruse, Konsullata Gjermane në Shën Petersburg duhet të ndërpresë aktivitetin jo më vonë se 18 shtatori 2026, ndërsa punonjësit e saj duhet të largohen nga territori rus deri në të njëjtën datë.

Moska ka vendosur gjithashtu të ndërpresë veprimtarinë e qendrave kulturore gjermane Goethe-Institut në Rusi. Punonjësit e dërguar nga Gjermania duhet të largohen nga vendi deri më 13 shtator.

Përplasja diplomatike mes dy vendeve është përshkallëzuar pas akuzave të Berlinit se Rusia ishte përgjegjëse për një tentativë sulmi me dron në aeroportin Leipzig/Halle në muajin gusht. Moska i ka mohuar këto akuza, duke i cilësuar si të pabazuara.

Ministria e Jashtme ruse ka akuzuar Berlinin për përshkallëzimin e marrëdhënieve dypalëshe dhe ka deklaruar se qeveria gjermane mban përgjegjësi për pasojat e zhvillimeve të fundit.

Vendimi i fundit shënon një tjetër goditje në marrëdhëniet Rusi-Gjermani, të cilat vijojnë të përkeqësohen në sfondin e tensioneve të lidhura me luftën në Ukrainë dhe përplasjes së fortë politike mes Moskës dhe vendeve evropiane.