TIRANË – Prokuroria e Tiranës ka kërkuar masën e sigurisë “arrest me burg” për këngëtarin Jozefin Marku dhe Kristjan Nikollin, të dyshuar për përfshirjen në ngjarjen e dhunshme ndaj 26-vjeçarit Eduard Kuçi.

Kërkesa për caktimin e masës së sigurisë është depozituar këtë të hënë në Dhomën Penale të Gjykatës së Shkallës së Parë të Tiranës. Tashmë pritet që gjykata të shqyrtojë kërkesën e organit të akuzës dhe të vendosë për masën e sigurisë ndaj dy të dyshuarve.

Sipas hetimeve, Marku dyshohet për disa vepra penale, ndërsa ndaj tij rëndon aktualisht akuza për “Heqjen e paligjshme të lirisë”. Katër veprat e tjera penale që dyshohet se lidhen me ngjarjen janë ende në fazën e verifikimit.

Ndërkohë, Kristjan Nikolli dyshohet se ka drejtuar automjetin tip “Land Rover”, i cili, sipas hetimeve, është përdorur gjatë ngjarjes. Përveç veprave penale që lidhen me dhunimin e Kuçit, ndaj Nikollit rëndojnë edhe akuzat për “Përkrahjen e autorit të krimit” dhe “Mbajtjen pa leje dhe prodhimin e armëve, bombave ose minave dhe të municionit”.

Gjatë kontrollit në banesën e Nikollit, Policia sekuestroi një sasi municioni, ndërsa është sekuestruar edhe automjeti “Land Rover”, i cili dyshohet se është përdorur në ngjarje.

Sipas Policisë, Marku dhe Nikolli dyshohet se, në bashkëpunim me persona të tjerë ende të paidentifikuar, kanë dhunuar Eduard Kuçin, pasi pretendohet se 26-vjeçari kishte bërë komente fyese ndaj këngëtarit në rrjetet sociale.

Në lidhje me ngjarjen janë shpallur në kërkim edhe A. H., 48 vjeç, dhe K. V., 27 vjeç. Hetimet vijojnë për identifikimin dhe kapjen e personave të tjerë që dyshohet se kanë marrë pjesë në ngjarje.

Ndërkohë, Eduard Kuçi është marrë në pyetje nga Policia në lidhje me rrethanat e ngjarjes, ndërsa materialet procedurale i janë referuar Prokurorisë së Tiranës për veprime të mëtejshme.

Tashmë pritet vendimi i gjykatës për masat e sigurisë. Kërkesa e Prokurorisë nuk përbën vendim fajësie dhe të dyshuarit prezumohen të pafajshëm deri në një vendim gjyqësor të formës së prerë.