Këmbët iu dobësuan pranë fundit të ndeshjes dhe u rrëzua në ring. Mjekët i bënë CPR dhe përdorën defibrilator, por Andy “The Butcher” Williams ndërroi jetë më vonë në spital

Bota e wrestling-ut dhe ajo e muzikës janë tronditur nga vdekja e papritur e Andy Williams, i njohur nga fansat me emrin “The Butcher”.

Ish-mundësi i All Elite Wrestling (AEW) ndërroi jetë në moshën 48-vjeçare, pasi pësoi një emergjencë mjekësore dhe u rrëzua gjatë një eventi wrestling-u në Pensilvani të SHBA-së.

Williams po merrte pjesë në eventin e Enjoy Wrestling në Mr. Smalls Theatre, në Millvale, pranë Pittsburgh-ut, mbrëmjen e së shtunës, 5 shtator.

Ai garonte në një ndeshje në çift përkrah partnerit të tij të vjetër, Jesse Guilmette, i njohur si The Blade.

Sipas dëshmitarëve, pranë fundit të ndeshjes Williams nisi të shfaqte probleme, këmbët iu dobësuan dhe ai u rrëzua. The Blade tentoi fillimisht ta ndihmonte të ngrihej, përpara se të kërkonte menjëherë ndërhyrjen e stafit mjekësor.

Mjekët dhe personeli i emergjencës i dhanë ndihmën e parë në vend, duke kryer masazh kardiak dhe duke përdorur një defibrilator. Më pas 48-vjeçari u transportua me ambulancë drejt spitalit.

Ai ndërroi jetë më vonë atë mbrëmje. Zyra e Mjekësisë Ligjore e Allegheny County konfirmoi vdekjen, ndërsa shkaku zyrtar nuk është bërë ende publik.

Pas incidentit, pjesa tjetër e eventit u anulua dhe publiku u largua nga salla.

Nga muzika te wrestling-u

Andy Williams ishte një figurë e veçantë pasi kishte arritur të ndërtonte dy karriera të suksesshme, në muzikë dhe në wrestling.

Në ring u bë i njohur si The Butcher, pjesë e ekipit “The Butcher and The Blade”. Ai iu bashkua AEW në vitin 2019 dhe qëndroi në kompani për më shumë se gjashtë vjet, deri në përfundimin e kontratës në qershor 2026.

Pas largimit nga AEW, Williams ishte rikthyer në skenën e pavarur të wrestling-ut dhe vazhdonte të garonte së bashku me The Blade.

Por shumë kohë përpara se të bëhej i njohur në ring, Williams kishte krijuar emër në muzikën metalcore.

Ai ishte një nga anëtarët themelues dhe kitarist i grupit Every Time I Die, të krijuar në vitin 1998. Williams qëndroi me grupin gjatë gjithë historisë së tij, deri në shpërbërjen në vitin 2022.

Më vonë ai u rikthye në muzikë me grupin Atomic Rule, i cili publikoi materialet e para në vitin 2025.

Lajmi për vdekjen e tij ka sjellë reagime të shumta nga figura të wrestling-ut dhe muzikës, të cilët kanë shprehur tronditjen dhe ngushëllimet për familjen e Williams.