Aktori i famshëm turk Serhat Mustafa Kilić (51 vjeç), shumë i njohur nga seriali "Ezel" u gjet i vdekur në shtëpinë e tij në lagjen Kagithane të Stambollit, raporton noa.al.

Kiliç, i cili mbahet mend nga publiku për rolet e tij të shumta në serialet dhe filmat e njohur turk, u gjet pa shenja jete pas disa ditësh pa kontaktuar me të afërmit e tij.

Sipas mediave turke, e dashura e tij erdhi në apartamentin e tij në lagjen Nurtepe pasi nuk kishte mundur të lidhej me të që nga e enjtja.

Kur ai nuk iu përgjigj thirrjeve dhe trokitjeve në derë, ajo hyri në apartament dhe e gjeti aktorin të shtrirë pa lëvizur në dhomën e ndenjes.

Ekipet e urgjencës dhe policia mbërritën shpejt në vendngjarje, dhe mjekët mundën vetëm të konfirmonin vdekjen e tij.

Policia nisi një hetim për të përcaktuar të gjitha rrethanat e vdekjes. Gjatë ekzaminimit të parë, sipas disa mediave turke, u vunë re mavijosje në trup rreth syve, si dhe në krahë dhe këmbë.

Megjithatë, nuk ka konfirmim zyrtar se lëndimet lidhen me vdekjen. Shkaku i saktë do të dihet pas autopsisë dhe analizave mjeko-ligjore.

Serhat Mustafa Kilić lindi më 8 korrik 1975 në Ankara. Ai përfundoi studimet për aktrim në Universitetin Bilkent dhe gjatë karrierës së tij interpretoi role të shumta në televizion, film dhe teatër.

Ai është i njohur për një audiencë më të gjerë për serialet si "Ezel", "Seksenler", "Söz" dhe "Kuruluş: Osman", ndërsa ka luajtur edhe në filmat "Veda", "Kış Uykusu", "Nokta" dhe "Mavzer".