POGRADEC – Një aksident rrugor është regjistruar këtë të diel në aksin Pogradec–Korçë, konkretisht në segmentin e Qafë Pllocës, duke lënë të plagosura dy gra.

Ngjarja ka ndodhur kur dy automjete që udhëtonin në kahe të kundërta janë përplasur me njëri-tjetrin.

Sipas informacioneve paraprake, shkak i aksidentit ka qenë humbja e kontrollit të automjetit nga njëri prej drejtuesve, çka ka sjellë përplasjen ballore.

Si pasojë e goditjes, dy shtetase kanë marrë dëmtime dhe janë dërguar për kontroll mjekësor në spitalin e Pogradecit, ku ndodhen jashtë rrezikut për jetën.

Shërbimet e Policisë kanë mbërritur në vendngjarje dhe po kryejnë veprimet e nevojshme hetimore për zbardhjen e plotë të shkaqeve dhe rrethanave të aksidentit.