HOLANDË – Një ndeshje e pazakontë është zhvilluar në Eredivisie, ku portieri Ronald Koeman Jr. ka shënuar dy gola për Telstarin, duke i dhënë skuadrës së tij një barazim dramatik 2-2 ndaj Cambuur.

31-vjeçari, djali i legjendës së futbollit holandez Ronald Koeman, realizoi të dy golat nga pika e bardhë, duke u kthyer në protagonistin absolut të takimit.

Koeman Jr. shënoi penalltinë e parë në minutën e 63-të, duke ngushtuar diferencën pasi Telstari ishte në disavantazh të dyfishtë.

Drama kulmoi në fund të takimit. Në minutën e 11-të të kohës shtesë, portieri ekzekutoi penalltinë e dytë dhe realizoi sërish, duke i siguruar Telstarit një pikë në sekondat e fundit të ndeshjes.

Rikthimi ishte edhe më i veçantë pasi Telstari luajti me 10 futbollistë që nga minuta e 20-të, pas kartonit të kuq të Nökkvi Þórisson.

Për Koeman Jr., kjo nuk është hera e parë që bëhet protagonist nga pika e penalltisë. Në maj të sezonit të kaluar, ai realizoi një penallti vendimtare në fazën play-off për mbijetesë, duke ndihmuar Telstarin të shmangte rënien.

Gjatë ndeshjes, futbollistët e Cambuur u përpoqën ta shpërqendronin portierin edhe gjatë ekzekutimeve nga pika e bardhë. Madje, një penallti e tretë u akordua fillimisht, por vendimi u anulua pas ndërhyrjes së VAR-it.

“Do të flasin me mua, e di këtë që më parë. Por nuk do të më acarojnë”, u shpreh Koeman Jr. pas ndeshjes.

Portieri tregoi gjithashtu besim të plotë te mënyra e tij e ekzekutimit.

“Jam thjesht në krye të listës. Mund të ekzekutoj një penallti të mirë dhe kam besim për këtë. Nuk kam dyshime”, deklaroi ai.

Të dyja penalltitë e realizuara nga Koeman Jr. shkuan në këndin e poshtëm të djathtë, ndërsa portieri la të hapur mundësinë për të ndryshuar krah në të ardhmen.

“Ndoshta duhet ta ndryshoj këndin ndonjëherë. Megjithatë, nëse është mjaftueshëm e vështirë, portieri nuk mund ta kapë”, tha ai.

Ronald Koeman Jr (son of ex-Barca player and manager Ronald Koeman) is the official PK taker of Telstar, an Eredivisie team.

Today, he scored 2 goals to guarantee his team a point, the second one being in the 101st minute.

Just like his father used to. pic.twitter.com/y3ejxslceQ

— MatchIQ (@MatchIQOnline) September 6, 2026