FIER – Është identifikuar viktima e aksidentit të rëndë të ndodhur mëngjesin e sotëm pranë rrethrrotullimit të Levanit, në aksin rrugor Levan–Tepelenë.

Viktima është Dashmir Beca, 55 vjeç, drejtuesi i automjetit tip “Audi”, i cili u përfshi në një përplasje të fortë me një automjet tip “Benz”.

Si pasojë e aksidentit, Dashmir Beca humbi jetën, ndërsa tre pasagjerët që ndodheshin në “Audi” janë dërguar në spital për ndihmë mjekësore. Sipas të dhënave paraprake, ata ndodhen jashtë rrezikut për jetën.

Edhe drejtuesi i automjetit tip “Benz” ka marrë ndihmë mjekësore dhe ndodhet jashtë rrezikut për jetën.

Në vendngjarje kanë mbërritur shërbimet e Policisë, të cilat kanë nisur hetimet për të zbardhur dinamikën e plotë të aksidentit dhe shkaqet që çuan në përplasjen fatale.

Paraprakisht dyshohet se shpejtësia tej normave të lejuara mund të ketë ndikuar në aksident, por rrethanat e plota dhe përgjegjësitë do të përcaktohen në përfundim të hetimeve.

Ngjarja është nën hetim nga autoritetet kompetente.

Çfarë thotë policia

Fier/Informacion paraprak

Në aksin rrugor “Levan-Tepelenë”, shtetasi G. M., 40 vjeç, duke drejtuar automjetin tip “Benz”, është përfshirë në një aksident rrugor me një automjet tip “Audi”, me drejtues shtetasin D. B., 55 vjeç.

Si pasojë e aksidentit, drejtuesi i automjetit tip “Audi”, shtetasi D. B., ka ndërruar jetë në vendngjarje.

Drejtuesi i automjetit tip “Benz”, shtetasi G. M., si dhe tre pasagjerët që ndodheshin në automjetin tip “Audi”, janë transportuar në spital për ndihmë mjekësore dhe ndodhen jashtë rrezikut për jetën.

Grupi hetimor ndodhet në vendngjarje dhe po punon për dokumentimin dhe sqarimin e plotë të rrethanave të aksidentit.