FIER – Një aksident i rëndë me pasojë vdekjen është regjistruar mëngjesin e sotëm në autostradën Levan–Tepelenë, pranë rrethrrotullimit të Levanit.

Dy automjete, një “Audi” dhe një “Benz”, janë përplasur me njëri-tjetrin, ndërsa përplasja ka rezultuar fatale për drejtuesin e “Audit”, shtetasin D. B., 55 vjeç.

Si pasojë e aksidentit, tre pasagjerë që ndodheshin në “Audi” janë transportuar në spital për të marrë ndihmë mjekësore. Sipas të dhënave paraprake, ata ndodhen jashtë rrezikut për jetën.

Edhe drejtuesi i automjetit tip “Benz” është jashtë rrezikut për jetën dhe po merr ndihmën e nevojshme mjekësore.

Në vendngjarje ndodhen shërbimet e Policisë, të cilat po punojnë për zbardhjen e plotë të rrethanave dhe dinamikës së aksidentit.

Paraprakisht dyshohet se shpejtësia tej normave të lejuara mund të ketë qenë një prej faktorëve të përplasjes, por shkaku i saktë dhe përgjegjësitë do të përcaktohen pas përfundimit të hetimeve.

Çfarë thotë policia

Fier/Informacion paraprak

Në aksin rrugor “Levan-Tepelenë”, shtetasi G. M., 40 vjeç, duke drejtuar automjetin tip “Benz”, është përfshirë në një aksident rrugor me një automjet tip “Audi”, me drejtues shtetasin D. B., 55 vjeç.

Si pasojë e aksidentit, drejtuesi i automjetit tip “Audi”, shtetasi D. B., ka ndërruar jetë në vendngjarje.

Drejtuesi i automjetit tip “Benz”, shtetasi G. M., si dhe tre pasagjerët që ndodheshin në automjetin tip “Audi”, janë transportuar në spital për ndihmë mjekësore dhe ndodhen jashtë rrezikut për jetën.

Grupi hetimor ndodhet në vendngjarje dhe po punon për dokumentimin dhe sqarimin e plotë të rrethanave të aksidentit.