Kreu i Partisë Demokratike, Sali Berisha, nga SHBA u ka bërë thirrje shqiptarëve në diasporë që t’i bashkohen protestës qytetare në Shqipëri, e cila sipas tij prej tre muajsh kërkon largimin e kryeministrit Edi Rama.

Gjatë takimit me shqiptarët në Amerikë, Berisha e vendosi shpopullimin e vendit në qendër të fjalës së tij, duke deklaruar se Shqipëria po përballet me një situatë të rëndë demografike.

“Është koha për veprim! Është emergjencë!”, u shpreh Berisha, duke e lidhur rikthimin e shqiptarëve në vend me ndryshimin politik.

Ai tha se Partia Demokratike ka një program që synon ripopullimin e Shqipërisë dhe rikthimin e emigrantëve, ndërsa theksoi nevojën për përmirësimin e pagave, funksionimin e institucioneve dhe forcimin e shtetit ligjor.

Berisha kritikoi gjithashtu qeverinë për menaxhimin e pasurive publike dhe akuzoi mazhorancën për bllokimin e institucioneve të drejtësisë.

Duke iu referuar protestave në Tiranë, ai deklaroi se prej tre muajsh të rinj dhe qytetarë po protestojnë kundër qeverisë Rama.

“Prej tre muajsh, rinia dhe qytetarët e Tiranës janë angazhuar në një protestë, më të madhen që nga vitet ’90. Në këtë protestë, ata kërkojnë largimin e Edi Ramës”, tha Berisha.

Sipas tij, protestuesit kërkojnë gjithashtu funksionimin e institucioneve, vendosjen e shtetit ligjor dhe mbrojtjen e pasurive publike.

Në përfundim, kreu i PD-së iu drejtua diasporës shqiptare në të gjithë botën, duke kërkuar që ajo të japë kontributin e saj në protestën kundër qeverisë.

“Unë ju bëj thirrje ju, i bëj thirrje diasporës shqiptare kudo në botë, të japë kontributin e saj në këtë protestë. Partia Demokratike e mbështet fuqishëm atë”, deklaroi Berisha.