Kreu i Partisë Demokratike, Sali Berisha, gjatë takimit me shqiptarët në New Jersey, ka bërë thirrje për bashkim të shqiptarëve brenda dhe jashtë vendit kundër qeverisë së Edi Ramës.

Berisha e cilësoi situatën në Shqipëri si të rëndë në aspektin politik, ekonomik dhe social, ndërsa akuzoi qeverinë për lidhje me krimin e organizuar dhe kartelet e drogës, kontroll të institucioneve dhe drejtësisë, si dhe për shpopullimin e vendit.

“Kam një thirrje për çdo shqiptar në Shqipëri dhe kudo që ndodhet”, deklaroi Berisha, duke iu drejtuar shqiptarëve në SHBA, Kanada, Itali, Gjermani, Greqi, Spanjë dhe vende të tjera.

Ai e cilësoi qeverinë shqiptare si një “narkoshtet antishqiptar” dhe akuzoi kryeministrin Edi Rama se ka përqendruar pushtetin në duart e tij.

Sipas Berishës, kjo situatë është shoqëruar me probleme në shëndetësi, arsim dhe drejtësi, ndërsa ai kritikoi edhe rritjen e çmimeve dhe largimin e shqiptarëve nga vendi.

“Shqipëria, dheu ynë i dashur, po rrokulliset ndoshta më shumë se kurrë në ekzistencën e saj”, u shpreh ai.

Berisha sulmoi gjithashtu Ramën për qëndrimet ndaj Kosovës, duke e akuzuar se vepron kundër interesave kombëtare dhe në bashkëpunim me presidentin serb Aleksandar Vuçiç.

Në fjalën e tij, kreu i PD-së shprehu mbështetje për autoritetet e Kosovës dhe për ish-krerët politikë të UÇK-së që ndodhen në Hagë, duke uruar që ata të shpallen të pafajshëm dhe të kthehen të lirë në Kosovë.

“Dua të përshëndes sot para jush dhe në emër tuaj, ish-udhëheqësit politikë të Kosovës që vuajnë vitet të tëra në burg dhe t’u uroj nga zemra të marrin pafajësinë dhe të kthehen të lirë në tokën e tyre”, tha Berisha.

Në përfundim, ai përsëriti thirrjen për bashkim kundër qeverisë socialiste.

“Nëse duam të shembim narkoshtetin antishqiptar, nëse duam të çlirojmë Shqipërinë nga kthetrat e ekstremit të majtë”, deklaroi Berisha, duke vijuar sulmin ndaj Partisë Socialiste dhe qeverisjes së Edi Ramës.