Teknologjia mbështet operacionet e shpëtimit në Gyirong dhe ndihmon në parandalimin e fatkeqësive dytësore

Me rikthimin e hyrjes për në pikën kufitare Gyirong, autoritetet po shtojnë monitorimin përgjatë rrugëve të shpëtimit e në zonën e prekur, për të parandaluar fatkeqësi të tjera dhe për të garantuar sigurinë e operacioneve pas rrëshqitjes së dheut që goditi më 26 gusht këtë zonë të Rajonit Autonom të Xizang-ut të Kinës Jugperëndimore.

Përfundimi i rrëshqitjes së dheut nuk do të thotë se rreziku ka kaluar. Pas shembjes së akullnajës, sasi të mëdha akulli e mbeturinash mund të kenë mbetur në lugina, ndërsa shpatet e paqëndrueshme mund të rrëshqasin përsëri gjatë reshjeve. Digat e mbeturinave të formuara nga sedimentet dhe shkëmbinjtë e lirshëm gjithashtu mund të mbingarkohen ose të çahen. Përpara se ekipet e shpëtimit të përparojnë, ato duhet të vlerësojnë qëndrueshmërinë e shpateve, nivelet e ujit dhe gjendjen e këtyre barrierave të mbeturinave.

Deri në orën 16:00 të 2 shtatorit, punonin 172 ekspertë dhe specialistë teknikë nga sektorët e burimeve natyrore dhe ujore, meteorologjisë, menaxhimit të emergjencave dhe Akademisë Kineze të Shkencave, me rreth 150 pajisje monitorimi e shpëtimi.

Ekipet meteorologjike kanë vendosur 10 stacione meteorologjike automatike dhe një radar meteorologjik me polarizim të dyfishtë në bandën X, për të monitoruar motin e fortë konvektiv brenda një rrezeje prej 75 kilometrash nga pika kufitare dhe pellgjet ujore përreth.

Ndërkohë, ekipet e burimeve natyrore po kryejnë inspektime për rreziqe gjeologjike dhe hartëzim 3D përgjatë dy rrugëve emergjente të hyrjes dhe zonave të tjera të prekura, ndërsa autoritetet ujore monitorojnë nivelet e ujit dhe kushtet e tjera hidrologjike.

Ministria e Menaxhimit të Emergjencave e Kinës ka vendosur radarë për monitorimin e shpateve, dronë dhe pajisje të tjera në zonat me rrezik të lartë, përfshirë ish-liqenin e krijuar nga bllokimi i lumit dhe barrierën e tij, si edhe grupin e akullnajave Lantang. Ekipet po bashkëpunojnë gjithashtu me autoritetet vendore për vendosjen e tabelave paralajmëruese, ngritjen e pikave të vëzhgimit dhe përcaktimin e zonave të evakuimit përgjatë autostradës kombëtare G216 dhe rreth pikës kufitare Gyirong.

Përveç operacioneve brenda vendit, Kina po ofron edhe mbështetje meteorologjike për Nepalin fqinj. Administrata Meteorologjike e Kinës ka ndarë me palën nepaleze të dhëna nga satelitët "Fengyun", ka ofruar parashikime të pandërprera deri në 30 ditë dhe ka zhvilluar një version të posaçëm të sistemit inteligjent të paralajmërimit meteorologjik “Mazu”, për të mbështetur reagimin emergjent dhe rindërtimin pas fatkeqësisë në Nepal.