TIRANË – Policia e Tiranës ka intensifikuar kontrollet ndaj automjeteve luksoze në kryeqytet, me fokus te pronësia, origjina dhe burimi financiar i përdorur për blerjen e tyre.

Sipas Policisë, aksioni synon identifikimin e automjeteve që mund të jenë përfituar përmes veprimtarisë kriminale, si dhe evidentimin dhe parandalimin e rasteve të trafikimit të paligjshëm të mjeteve.

Në kuadër të operacionit, strukturat për Hetimin e Krimeve Ekonomike dhe Financiare, në bashkëpunim me Forcën e Posaçme Operacionale, Forcën e Posaçme “Shqiponja” dhe Policinë Rrugore, kanë kontrolluar dhjetëra automjete luksoze në zona të ndryshme të Tiranës.

Për verifikimin e mjeteve është përdorur një aparaturë e posaçme, përmes së cilës kontrollohen të dhënat identifikuese të automjeteve. Pas verifikimit në sistem, efektivët kanë kryer kontrolle të mëtejshme mbi pronësinë, origjinën dhe historikun e blerjes, shitjes dhe posedimit të tyre.

Një tjetër element i rëndësishëm i kontrolleve ka qenë verifikimi i burimit të të ardhurave të përdorura për blerjen e automjeteve. Sipas Policisë, qëllimi është evidentimi i rasteve kur pasuria mund të jetë krijuar apo siguruar përmes veprimtarisë kriminale.

Autoritetet kanë verifikuar gjithashtu nëse automjetet e kontrolluara mund të jenë të përfshira në skema të trafikimit të paligjshëm.

“Për verifikimin e mjeteve është përdorur një aparaturë e posaçme, përmes së cilës kontrollohen të dhënat identifikuese të automjeteve. Pas verifikimit në sistem, Policia ka kryer kontrolle të mëtejshme mbi pronësinë, origjinën dhe historikun e blerjes, shitjes dhe posedimit të tyre”, njofton Policia e Tiranës.

Në përfundim të verifikimeve, materialet procedurale janë referuar në Prokurori, e cila pritet të vijojë me hetimet dhe veprimet e mëtejshme ligjore.