TIRANË – Kryeministri Edi Rama ka reaguar lidhur me debatin për pagat e magjistratëve dhe zbatimin e vendimit të Gjykatës Kushtetuese për pagat në sistemin e drejtësisë.

Në një reagim në rrjetet sociale, Rama thekson se institucionet duhet të veprojnë brenda kompetencave të përcaktuara dhe se vendimi për fondin e pagave të pushtetit gjyqësor kalon përmes pushtetit ekzekutiv dhe atij legjislativ.

Sipas kryeministrit, Gjykata Kushtetuese pret që Parlamenti të ekzekutojë vendimin e saj për pagat e gjyqësorit, ndërsa nuk ndërhyn vetë në procesin e administrimit të fondeve shtetërore.

“Secili institucion në vendin e vet. Fondin e pagave të pushtetit gjyqësor e propozon pushteti ekzekutiv dhe e miraton pushteti legjislativ”, shkruan Rama.

Ai shton se, për sa kohë Gjykata Kushtetuese pret që Parlamenti të zbatojë vendimin e saj dhe nuk ndërhyn vetë në fondet e thesarit të shtetit, çdo koment tjetër për këtë çështje është, sipas tij, “në rastin më të mirë humbje kohe”.

Reagimi i plotë i Ramës

“Secili institucion në vendin e vet. Fondin e pagave të pushtetit gjyqësor e propozon pushteti ekzekutiv dhe e miraton pushteti legjislativ. E kur vetë Gjykata Kushtetuese pret parlamentin të ekzekutojë vendimin e saj për pagat e gjyqësorit dhe nuk kuturiset të hapë vetë derën e thesarit të shtetit, çdo koment tjetër është në rastin më të mirë humbje kohe dhe në më të keqin as mos e pyet se ç’është…”